اللى بيحصل ده مهزلة.. تفاصيل أزمة أحمد السعدنى مع زينة  

أحمد السعدنى وزينة

وجه الفنان أحمد السعدنى، انتقادا لاذعا للفنانة زينة بطلة مسلسله الجديد “كله بالحب”، والمقرر عرضه رمضان المقبل.

وقال “السعدنى” فى منشور له على “فيسبوك” إن زينة تتدخل فى جميع تفاصيل العمل بما فيها بوسترات المسلسل والمقاطع الدعائية للعمل.

وأضاف: “الحقيقة أنا عمرى ما عملت مشكلة فى شغلى، وعمرى ما اختلفت مع زمايلى، إنما أنا اللى بيحصل معايا فى المسلسل اللى شغال فيه 24 ساعة مبروحش بيتنا عشان يلحق العرض والواحد ساكت وبيعدى بلاوى عشان الزنقة والظروف، أنا متربى فى استوديوهات، كبرنا أنا واللى زيى اللى كان بيتقال عليهم أبناء الفنانين كإنها شتيمة على احترام مهنتنا مواعيدنا ومذاكرتنا وتحضيرنا للشغل، احترامنا للكلمة قبل العقد”.

وأضاف: “للأسف شركة الإنتاج ملتزمتش معايا باتفاقهم إللى على أساسه وافقت أشتغل، وكان شرط أساسى لقبولى الشغل معاهم، والحقيقة أول مرة أشوف تصميم دعاية عمل فنى من أفيشات وبرومو بتعمله زميلة فى العمل طول عمرى كنت فاكرها من اختصاص شركة الإنتاج، الحقيقة أنا ضهرى فى الحيط أكمل وأقبل بالعبث ده عشان باقى الزملا الفنانين والفنيين المشاركين فى العمل اللى ملهمش ذنب وإلا أقعد فى بيتنا وأكتفى باللى صورته وأطلب من النقابة تجيبلى حقوقى المادية”.

واختتم قائلا: “فى كل الأحوال أنا بعتذر لأى شخص بيحبنى عن تواجدى فى هذا العمل، لأن الحقيقة اللى بيحصل ده مهزلة”.

“كله بالحب” بطولة الفنانان زينة وأحمد السعدنى، وصابرين وهالة فاخر ومصطفى درويش ومحسن منصور وريم البارودى، وسامر المصرى، ومن تأليف ورشة أحمد الشخيبى، وإخراج عصام عبدالحميد، وإنتاج شركة سكيرمو ميديا لإسلام المرسى ونجلاء رشدى وأحمد السمان.